AAK garon e vetme në zgjedhjet e reja, insiston në postin e presidentit

Nënkryetari i AAK-së, Ahmet Isufi pas mbledhjes së kryesisë të kësaj partie ka thënë se AAK do të garojë në zgjedhje e vetme.

Isufi ka thënë se janë të gatshëm që të udhëheqin me Qeverinë e Kosovës.

“Në këto zgjedhje do të dalim si AAK sepse jemi parti e konsoliduar mirë që udhëheqim në shtatë komuna dhe bashkë qeverisim në shtatë të tjera dhe jemi të përgatitur gjithashtu që të udhëheqim edhe me Qeverinë e Kosovës”, tha Isufi, transmeton Telegrafi.

Sa i përket kandidimit të kreut të partisë, Ramush Haradinaj për president, Isufi u shpreh se ky post i takon Haradinajt.

“Ne e mbajmë të njëjtin qëndrim dhe vazhdojmë që mendojmë që z.Haradinaj meriton të jetë president i vendit, sepse kemi parë edhe në të kaluarën që kryetarë të partive kanë qenë në pozitë të tillë”, ka thënë Isufi.

I pyetur se a mund të jetë Haradinaj kandidat edhe për kryeministër, Isufi theksoi se “Jemi në konsultime dhe nuk e ndërrojmë qëndrimin për shkak se nuk bëjmë lojë me opinionin dhe vetveten”.

Ai bëri të ditur se në takimin me ushtruesen e detyrës së presidentes, Vjosa Osmani do të shkoj Besnik Tahiri. Isufi shtoi se si AAK janë të gatshëm të shkojnë në zgjedhje. /Telegrafi/

Tags: ,