Erdogan krahason Imamoglun me Sisin

Presidenti i Republikës së Turqisë, Erdogan, sot gjatë ditë ka bërë një paralele të çuditshme. Erdogan e ka krahasuar kandidatin e përbashkët opozitar për Kryetar të Stambollit, Ekrem Imamoglu me Presidentin e Egjiptit, Sisi.

Sisi e ka udhëhequr Ushtrinë e Egjiptit në grusht-shtetin e cili rezultoi rrëzimin nga pushtetit të Presidentit të atëhershëm të Egjiptit, Morsi, i cili vdiq në sallë të gjykimit ditë më parë.

Siç raporton BBC në gjuhën turke, Erdogan, gjatë një tubimi parazgjedhor të mbajtur në Stamboll, qytetarët e pranishëm i ka pyetur se kë do ta votojnë të dielën. “Do të themi Sisi, apo do të themi Binali Yildirim?”, ka pyetur Erdogan qytetarët e tubuar.

See the source image

Ekrem Imamoglu, më 31 mars pati dalë triumfues në zgjedhjet për kryetar të Qytetit Metropolitan të Stambollit përballë kandidatit të partisë së Presidentit Erdogan, Binali Yildirim. Megjithatë, autoriteti qendror zgjedhor i shtetit turk, pati vendosur për anulimin e zgjedhjeve në fjalë.

Zgjedhjet e përsëritura për kryetar të Stambollit do të mbahen të dielën, më 23 qershor. Kompanitë anketuese turke favorizojnë kandidatin opozitar Imamoglu edhe në zgjedhjet e përsëritura të së dielës.

Humbja eventuale në Stamboll, do të ishte një humbje e madhe politike për Presidentin aktual turk Erdogan dhe do të nxiste fuqizimin e mëtejmë të forcave laike të këtij shteti.