“Ju lutem reflektoni”, mjekët kosovarë i dërgojnë letër ministrit Vitia pas situatës me koronavirusin

Federata e Sindikatave të Shëndetësisë së Kosovës i ka bërë ministrit të Shëndetësisë, Arben Vitia, një kërkesë publike në emër të gjithë punëtorëve shëndetësor të Republikës së Kosovës, duke i këkruar që të reflektojë.

Kjo ka të bëjë me situatën e fundit me koronavirusin, teksa mjekët e Kosovës kanë kërkuar nga ministri Vitia, që tregojë për kapacitetet që ka Kosova në luftimin e këtij virusi.

Ata po ashtu kanë kërkuar nga Vitia të merr masa për situatën e fundit të krijuar.

Pika e katërt e kësaj letre, kërkon nga ministri i Shëndetësisë që të tregojë sa është kostoja financiare me qëllim të parandalimit të kësaj sëmundjeje.

Letra e plotë:

I nderuari Z. Ministër,

Duke u nisur nga situata aktuale në mbarë globin tonë, po ju adresohemi me disa pyetje konkrete me qëllim të mospërhajes së panikut në komunitetin tonë:

Cilat janë kapacitetet tona për mbrojtjen e pandemisë së supozuar nga OBSH-ja me qëllim të luftimit të Coronavirusi COVID -19.

Cilat janë masat mbrojtëse përveq atyre që i proklamoni në lidhje me ruajtjen e shëndetit dhe sigurisë së punëtorëve shëndetësor.

Cilat janë masat të cilat i keni ndërmarr ju me Ministritë përkatëse me qëllim të funksionalizimit shtetëror për parandalimin e kësaj pandemie të supozuar.

Sa është kostoja financiare e përllogarritur me qëllim të parandalimit të kësaj pandemie(sipas OBSH-së).

Pra i nderuari Ministër, duke parë situatën e krijuar që në mediume tona p.sh. nuk kemi asnjë komunikim me publikun për masat e parandalimit të kësaj pandemie të supozuar, ju lutem reflektoni.

Federata e Sindikatave të Shëndetësisë së Kosovës është e hapur edhe jashtë protokoleve burokratike që po i bëni të angazhohemi me qëllim të ruajtjes së shëndetit dhe sigurisë në punë të punëtorëve shëndetësor dhe popullatës, gjë të cilën ju kam trasmetuar edhe përmes komunikimit privat.

Edhe një herë ju lutem që të reflektoni dhe të merrni në konsideratë apelin tonë sepse situata e krijuar në këtë vend është përgjegjësi e secilit.