Kandidati për president i Barcelonës, Farre: Do ta mbaj Messin në skuadër dhe do ta rikthej Neymarin

Kandidati për president i Barcelonës, Jordi Farre, ka thënë se Lionel Messi dëshiron të qëndrojë në klub dhe se nëse ai fiton zgjedhjet, argjentinasi do të nënshkruajë një kontratë të re.

Marrëveshja aktuale e 33-vjeçarit me klubin nga “Camp Nou” përfundon në vitin 2021.

Messi e kërkoi në verë largimin, por nuk u lejua nga ish-presidenti i klubit, Jose Maria Bartomeu.

Argjentinasi u tërhoq në fund, me fjalët se nuk mund të shkonte në gjyq me klubin ku u rrit dhe u bë ndër më të mirët e historisë së futbollit.

Tash e disa muaj Leo Messi, ka qenë i lidhur me klube si Manchester City dhe PSG, pasi që në janar mund të nis bisedimet.

Gjithsesi, njëri nga kandidatët me serioz për të fituar postin e presidentit në klub është Jordi Farre, i cili  është i bindur se Messi dëshiron të qëndrojë.

“Messi dëshiron të qëndrojë te Barça. Kjo është ajo që unë di. Familja e tij dëshiron të qëndrojë në Barcelonë dhe ne do të punojmë për të”.

“Do të shkoja aq larg sa të thosha se, nëse fitojmë zgjedhjet, Messi do të rinovojë marrëveshjen e tij. Rinovimi i tij do të ndodhte automatikisht më  25 janar, nëse fitoj zgjedhjet”, ka thënë Farre për Onda Cero.

I njëjti shtoi se do të punojë që të nënshkruajë me Neymarin nga Paris Saint-Germain.

“Nënshkrimi i Neymarit do të jetë i lirë, sepse investimi do të jetë më i madh se shpenzimi”, deklaroi ai.