Kurti më në fund deklarohet për aktakuzat ndaj Thaçit,Veselit, Selimit e Krasniqit

Kryetari i Lëvizjes Vetëvendosje, Albin Kurti, ka folur për herë të parë publikisht pas arrestimit dhe paraqitjes në Gjykatën Speciale të ish-drejtuesve të Shtabit të Përgjithshëm të UÇK-së: Hashim Thaçit, Kadri Veselit, Rexhep Selimit e Jakup Krasniqit.

Në një konferencë për media Kurti tha se Lëvizja Vetëvendosje ka folur gjerë e gjatë në 7 vitet e fundit për Gjykatën Speciale dhe se nuk ka nevojë ta përsërisin.

“Jemi duke paguar çmimin e gabimeve politike”, ka thënë Kurti, duke përmendur votimin me 82 vota të Gjykatës Speciale në Kuvendin e Kosovës.

“Në njërën anë, UÇK është lënë jashtë Deklaratës së Pavarësisë dhe Kushtetutës, ndërsa, në anën tjetër, kjo Gjykatë e cila iu sipërvendos shtetit me votat e 82 deputetëve u pranua të bëhet pjesë përbërëse e Kosovës përmes amendamentimit të Kushtetutës”, tha Kurti.

Kreu i LVV-së Gjykatën Speciale e ka quajtur të padrejtë dhe të njëanshme.

Kurti tha shteti i Kosovës duhet të organizojë mbrojtjen e të akuzuarve në Gjykatën Speciale.

“Në Hagë nuk janë duke u përndjekur vetëm individët por as nuk mund të mbrohen të pandehurit si individë. Shteti i Kosovës duhet ta organizojë e ta koordinojë mbrojtjen e të pandehurve. Ata e pamë se kanë avokatët e tyre secili, mirëpo nevojitet bashkërendimi nga shteti. UÇK nuk ka qenë e asnjërit por e të gjithëve dhe të gjithë duhet ta mbrojmë atë. Kjo është edhe punë qeverie, kjo është punë sidomos e qeverisë”, shtoi Kurti.