Kurti tregon se kur fillon shpërndarja e parave të premtuara nga pakoja emergjente

Shumë biznese private në Kosovë kanë ndërprerë veprimtarinë e tyre, duke u detyruar që të largojnë edhe punëtorët nga puna. E gjithë kjo ka ndodhur pasi Qeveria e Kosovës ka ndërmarrë një sërë masash për të parandaluar përhapjen e koronavirusit.

Pas situatës së krijuar nga COVID-19, Qeveria e Kosovës ndërmori një sërë masash në mënyrë që të parandalohet përhapja e koronavirusit.

Përpos kësaj, për t’i dalë në ndihmë bizneseve, përmes pakos emergjente, Qeveria e Kosovës ka paraparë disa masa si ndihmë në përballje me pasojat e pandemisë.

Duke filluar nga ata që marrin social, pensionerët, punëtorët e bizneseve, por edhe shtesa për policët, mjekët, infermierët e shumë të tjerë.

Kryeministri në detyrë Albin Kurti gjatë qëndrimit të sotëm në Gjakovë u pyet se kur do të fillojë funksionalizimi i kësaj pako, apo shpërndarja e këtyre parave të parapara tashmë me ligj.

Ai tha se pako është përgatitur, por që dy ministrat përkatës po përkujdesen nga afër për detajet.

“Ne e kemi përgatitur Pakon Emergjente Fiskale dhe dy ministrat në veçanti ai i Financave, Besnik Bislimi, por edhe ajo e Ekonomisë Rozeta Hajdari janë në kontakt të rregullt me të gjitha kategoritë të cilat do t’i ndihmojnë. Jemi përpjekur që të mos jenë vetëm masa ekonomike, por socio-ekonomike , pra edhe sociale që jo vetëm bizneset pro të ndihmohen edhe punëtorët drejtpërsëdrejti”, tha ai.

Tutje Kurti tha se është mirë që të përcillen edhe publikimet që ata i bëjnë, por edhe të kontaktohen direkt për hollësitë të cilat janë paraparë.

Kujtojmë se sektori privat llogaritet punëdhënësi më i madh në Kosovë. Në këtë sektor llogaritet se punojnë mbi 220 mijë persona./FaktePlus