LVV e dorëzon në Supreme ankesën ndaj vendimit të PZAP-së për votat e diasporës

Sot Lëvizja Vetëvendosje dorëzoi në Gjykatën Supreme ankesën me qëllim lejimin e numërimit të të gjitha pakove me fletëvotime nga bashkatdhetarët si dhe hedhjen poshtë të vendimit të PAZP-së.

“Presim që në afat sa më të shpejtë Gjykata Supreme të marrë vendim duke ia mundësuar realizimin e të drejtës për të zgjedhur dhe numërimin e fletëvotimeve të qytetarëve tanë me banim jashtë Kosovës”, thuhet në njoftimin e LVV-së, transmeton Koha.net.

Kujtojmë se 4 mijë e 639 zarfe me fletëvotimet e ardhura nga diaspora sërish janë refuzuar që të shkojnë për numërim në Qendrën e Numërimit dhe të Rezultateve. Këtë vendim e kanë marrë gjyqtarët e Panelit Zgjedhor për Ankesa dhe Parashtresa.

“Rikujtojmë edhe njëherë se pakot me fletëvotime janë dërguar brenda afateve kohore nga bashkëatdhetarët dhe si të tilla ato duhet të numërohen dhe të bëhen pjesë e rezultatit final të zgjedhjeve në Republikën e Kosovës”, përfundon njoftimi i Vetëvendosjes. / Koha.net