Majlinda Kelmendi edhe më afër titullit të tretë në Kampionatin Botëror

Majlinda Kelmendi është buzë kompletimit të het-trikut në Kampionatin Botëror të Xhudos, pasi tani ka kaluar në gjysmëfinale të Tokyo 2019.

Xhudistja kosovare e mposhti kampionen e botës nga vitit 2017, japonezen Ali Shishime, në çerekfinale, në kërkim të titullit të tretë botëror, raporton Gazeta Express.

Edhe pse luftën e nisi zbehtë, 28-vjeçarja mori kontrollin ndaj japonezes dhe nuk la hapësirë për asnjë gabim.

Tre ndëshkime radhazi i kushtuan Shishimes me humbje dhe Kelmendit me kalim në gjysmëfinale, ku do të takohet me kampionen në fuqi, japonezen tjetër Uta Abe.

Kosovarja, kampione bote më 2013 dhe 2014, rundin e parë e kaloi pa luftë, në rundin e dytë e mundi Luz Olvera nga Meksika. Në rundin e tretë e kaloi Agata Perencin e Polonisë, para se ta mposhte Shishimen në çerekfinale. /Gazeta Express/