Ministri në detyrë i Arsimit dhe Shkencës, Ramë Likaj ka thënë se ka kërkuar nga drejtorët e Drejtorive Komunale të Arsimit, që të bëhen përgatitjet e nevojshme për fillimin e gjysmëvjetorit të dytë.
Likaj ka pohuar se gjysmëvjetori i dytë i vitit shkollor do të fillojë më 18 janar, teksa ka thënë se parësor mbetet mësimi sipas skenarit A me prezencë në shkolla.
“Parësor mbetet mësimi sipas skenarit A me prezencë në shkolla, mirëpo varësisht nga situata epidemiologjike do të përdoren edhe skenarët tashmë të njohur (B dhe C) të paraparë në udhëzuesin e përgjithshëm të MASh”, ka shkruar ai një postim në Facebook.
Më tej, në shkrimin e bërë, ai ka theksuar se ka kërkuar bashkëpunim të ngushtë te të gjithë akterëve në mënyrë që të krijohen të gjitha kushtet për fillim të mbarë të mësimit.
“Në takim i pranishëm ishte edhe shefi i zyrës së UNICEF-it në Kosovë, Murat Sahin të cilin e falënderova për ndihmën e jashtëzakonshme që na kanë dhënë gjatë kësaj kohe”, ka thënë ai.
Theksojmë se gjysmëvjetori i parë i vitit shkollor kishte përfunduar më 18 dhjetor, për shkak të situatës epidemiologjike.