Nisma thotë se QNR shkeli ligjin kur i hapi dyert votave ilegale nga Serbia

Nisma Socialdemokrate ka mbajtur mbledhjen e Kryesisë ku është diskutuar për administrimin e rezultatit të dalë nga zgjedhjet e 6 tetorit dhe në veçanti numërimin e votave të cilat kanë ardhur jashtëligjshëm nga Serbia.

Në një komunikatë dërguar medieve, Nisma njofton se në bazë të numërimit të votave të rregullta do të jetë pjesë e Kuvendit të Kosovës.

Në anën tjetër, Nisma me shqetësim ka percjellur zhvillimet e djeshme ku në mënyre të papritur dhe duke mos respektuar procedurat ligjore, votat e parregullta të ardhura nga Serbia janë bartur në QNR dhe janë numëruar.

“Nisma Socialdemokrate vlerëson se QNR ka shkelur ligjin kur i ka hapur dyert votave ilegale nga Serbia duke i pranuar ato pa vlerësimin ligjor se a janë apo nuk janë të rregullta dhe pa vendim të KQZ-së. Në raportin e 11 tetorit vet divizioni për shërbimin e votuesve jashtë vendit, në raportin që ia ka paraqitur KQZ-së, ka identifikuar një mal parregullsi për këto vota të ardhura nga Serbia”, thuhet ndër të tjera në këtë komunikatë.

“Duke filluar nga ajo që ato nuk kanë ardhur përmes postës dhe nuk janë postuar ashtu siç e parasheh ligji për votim me postë, por janë bartur në paketa dhe janë sjellur në postën numër 6 në Prishtinë, e deri të ardhja e këtyre votave të grumbulluara në paketa, ku siç e thotë raporti paketa më e vogël i ka 157 zarfa, ndërsa paketa më e madhe i ka 238 zarfa”.

Më tutje, Nisma thotë se mbi 2000 vota kanë ardhur në 19 paketa që është në kundërshtim të plotë me Ligjin për Zgjedhjet numër 03/L 073 neni 97 pika 1.

“Pastaj me shumë parregullsi siç janë zarfet identike që secila me nga një shenjë. Përveç këtyre parregullsive ligjore, kur i shtojmë asaj që për këto vota është hapur hetime për shkak të dyshimit për helmim, e që kemi parë pasoja të njerëzit.

Janë dhjetëra zyrtarë që kanë kërkuar ndihme mjekësore dhe për këtë çështje është hapur hetim nga Prokuroria dhe përkundër krejt kësaj, pa pas një raport përfundimtar nga Prokuroria për hetim, ato vota janë dërguar në numërim”.

Nisma dyshon se dikush është i interesuar përmes kontrabandimit të këtyre votave të paligjshme të prishë procesin zgjedhor duke ndikuar drejtperdrejt në rrezultatin zgjedhor dhe të deformoj vullnetin e qytetarëve të Kosovës.

“NISMA i bën thirrje KQZ-së, të kryej detyrën e saj kushtetuese si autoriteti kryesor në respektimin e ligjit dhe rregullores se saj në administrimin e drejt të këtij procesi zgjedhor dhe të mos lejoje që përmes trafikimit të votave të parregullta të deformoj vullnetin e qytetarëve të Kosovës të shprehur në zgjedhjet e lira. Nisma po percjellë në vazhdimësi çdo hap të këtij procesi dhe do të angazhoeht që vullneti i mbi 40 mijë votuesve tanë të mos deformohet nga askush”, përfundon komunikata e Nismës.