Pamje të mjeteve me të cilat janë sulmuar gazetarët në veri

Gazetarët dhe kameramanët që kanë shkuar në veri për të përcjellë zhvillimet atje pas aksionit të Policisë së Kosovës, janë sulmuar nga qytetarët që po e kundërshtojnë këtë aksion, raporton Express.

Gazetari i T7, Çlirimtar Morina i cili po qëndron në veri bashkë me kamermanin Fitim Sylejmani, ka treguar se në drejtim të tyre janë hedhur tri bomba dore.

Ata kanë dërguar edhe fotografi të mjeteve me të cilat po sulmohen.

Për sulmin ndaj gazetarëve ka reaguar Asociacioni i Gazetarëve të Kosovës.

Në reagimin e AGK-së thuhet se janë sulmuar gazetarë të mediave të ndryshme shqiptare në “Lagjen e Boshnjakëve” në Mitrovicën e Veriut.

Po ashtu, AGK ka bërë me dije se në Leposaviq sulmuesit kanë ndjekur nga pas veturat me gazetarë.

“AGK-ja shpreh shqetësim për ambientin e rëndë dhe të pasigurt të punës për gazetarët gjatë ditës së sotme në komunat veriore të Kosovës. Sipas raporteve, janë sulmuar disa gazetarë të mediave të ndryshme shqiptare në “Lagjen e Boshnjakëve” në Mitrovicën e Veriut dhe një tjetër incident ka ndodhur rrugës për në Leposaviq ku protestuesit kanë ndjekur nga pas veturat me gazetarë”, ka bërë të ditur AGK.

Po ashtu, AGK ka njoftuar se janë sulmuar edhe gazetarët e portalit “Kossev”.

“Ndërkohë, sulme dhe presione ka pasur edhe ndaj gazetarëve të portalit lokal “Kossev”, nga protestuesit. Si pasojë, redaksia i ka tërhequr ekipet e saj nga terreni”, thuhet në reagim.

AGK ka ftuar policinë të ofrojë siguri për gazetarët.

“AGK-ja fton Policinë e Kosovës që të ofrojë siguri për gazetarët që të kryejnë punën e tyre në formë të papenguar”, deklaron AGK.

Ndryshe, gjatë aksionit të sotëm të Policisë së Kosovës në veri, gazetarët dhe kameramanët që kanë shkuar për të raportuar për zhvillimet atje, janë sulmuar nga qytetarët, raporton Express.

Se janë përdorur mjete të tilla ka njoftuar edhe Policia e Kosovës, përmes një njoftimi drejtuar mediave.

Sipas Policisë, qytetarët atje janë grumbulluar, kanë krijuar bllokime të rrugëve me mjete të ndryshme transportuese, kanë përdorur bombola gazi, shok bomba, të shtëna me armë zjarri e granata dore.

“Operacioni policor është realizuar në rajonin e Prishtinës, Pejës, Mitrovicës së Jugut dhe Mitrovicës së Veriut. Përderisa në të gjitha rajonet tjera operacioni policor ka kaluar pa probleme, në Mitrovicë Veri grupe kriminale në mënyrë të organizuar janë grumbulluar, kanë krijuar bllokime të rrugëve me mjete të ndryshme transportuese, kanë përdorur bombola gazi, shok bomba, të shtëna me armë zjarri e granata dore, me qëllim të pengimit dhe sulmit ndaj zyrtarëve doganorë dhe policorë, të cilët kanë qenë në kryerje të detyrës zyrtare”, thuhet në njoftimin e Policisë./Gazeta Express