Qëndrimet e AAK-së lidhur me dialogun e Kosovës me Serbinë

Shefi i Grupit parlamentar të Aleancës për Ardhmërinë e Kosovës, Daut Haradinaj, ka shprehur qëndrimet e Aleancës për Ardhmërinë e Kosovës në seancën e sotme të Kuvendit të Kosovës, ku kryeministri Avdullah Hoti po raporton për dialogun me Serbinë.

Haradinaj, ka thënë se është kërkesë e AAK-së që në proces të jenë edhe Shtetet e Bashkuara të Amerikës, duke thënë se pa SHBA-në edhe po të arrihet marrëveshja është zor e implementueshme.

“Dialogu në Bruksel nuk ka prodhu asnjë të mirë pa prezencë të SHBA-së. Nuk guxon të rrëshqitet në dialog teknik, sepse dialogu teknik i hap Serbisë dyert e integrimeve. Një marrëveshje pa SHBA-në, zor që është e zbatueshme. Asnjë keqkuptim në bashkëqeverisje nuk e kemi, por është kërkesë eksplicite që SHBA-ja të jetë në negociata”, ka thënë ai.

Haradinaj ka adresuar kritika të ashpra drejt BE-së. Ai ka thënë se Bashkimi Evropian e ka mashtruar Kosovën për 10 vjet.

“BE-ja tash e 10 vjet e ka mashtru Kosovën për liberalizim të vizave. Nuk kemi çka me lypë në Bruksel, as te Borelli as te dikush tjetër, pa i heq vizat. Nuk guxojmë të ndjehemi inferiorë dhe as kokulur përballë Serbisë”, tha ai.

Po ashtu, Haradinaj tha se përgjatë procesit Serbia duhet t’i marrë përgjegjësitë e veta për krimet e kryera.

“Serbia duhet të përgjigjet për krimet e veta, dosjet ushtarake, policore, paramilitare, UDB, kostit ushtarak, janë varri masiv i mijra shqiptarëve të vrarë përplot 1 shekull, veçmas në luftën e fundit. Arkivat e UÇK-së, janë publike dhe janë krenaria e popullit tonë. Nëse ne ndihemi inferiorë përballë Serbisë, ne i japim favore që të ecë përpara në rrugën evroatlantike”, theksoi Haradinaj.

Po ashtu, në fund, Haradinaj e kritikoi Hotin. Ai tha se Selim Selimi, i dërguar i AAK-së për dialogun me Serbinë, duhet të trajtohet seriozisht nga kryeministri dhe ai të jetë në tavolinat e diskutimeve.

“Hoti duhet me trajtu seriozisht partnerin e koalicionit, sidomos anëtarin Selim Selimi”, tha ai në fund.