SHBA përgëzon Kosovën për hartimin e listës së të përfshirëve në akte terroriste

Këshilltari amerikan për Sigurinë Kombëtare, John Bolton, përmes një postimi në rrjetin social twitter, përgëzoi Kosovën për vendimin që të hartojë listën e personave, grupeve dhe organizatave të përfshira në akte terroriste, të cilat do t’u nënshtrohen masave kufizuese në territorin e vendit.

Zoti Bolton shkroi se “Shtetet e Bashkuara përgëzojnë përcaktimin e Kosovës që ta cilësojë Hezbollahun si një organizatë terroriste. Ky zgjatim terrorist iranian vazhdon të kërcënojë qëndrueshmërinë në Lindjen e Mesme dhe në gjithë botën. Bota po njeh mbështetjen terroriste të Iranit dhe emërtimin e përfituesit kryesor të tij: Hezbollahun”, shkroi zoti Bolton.

Javën e kaluar, presidenti i Kosovës, Hashim Thaçi, përmes një dekreti kërkoi nga institucionet e sigurisë që të hartojnë një listë dhe masat kufizuese ndaj personave, grupeve dhe organizatave të përfshira në akte terroriste.

Dekreti i presidentit që hyn në fuqi menjëherë, kërkon nga institucionet vendase të sigurisë që deri te hartimi i listës, Kosova të zbatojë listën e Bashkimit Evropian të personave, grupeve dhe organizatave të përfshira në akte terroriste, që është rifreskuar në janar të këtij viti.

Në listën e Bashkimit Evropian për zbatimin e masave specifike për luftimin e terrorizmit gjenden 21 grupe apo etnitete dhe 15 persona.

Dekreti u mbështet nga sekretari amerikan i shtetit, Mike Pompeo, i cili shkroi ditë më parë po ashtu se “Shtetet e Bashkuara mirëpresin përcaktimin e Hezbollahut si organizatë terroriste nga autoritetet e Kosovës”.

/Zëri i Amerikës, link: https://www.zeriamerikes.com/a/us-kosovo-Hezbollah-/4982901.html/