Soreca i dorëzoi Ruçit, raportin e KE

Kryetari i Kuvendit të Shqipërisë, z. Gramoz Ruçi, priti sot ambasadorin e Bashkimit Evropian në Tiranë, z. Luigi Soreca.

Ambasadori Soreca i dorëzoi Kryetarit të Kuvendit, z. Gramoz Ruçi, raportin e progresit të Komisionit Evropian për vitin 2019, me rekomandimin pozitiv për çeljen e negociatave me Shqipërinë, pa kushte.

“Kam kënaqësinë që t’ju dorëzoj raportin, duke rikonfirmuar rekomandimin pozitiv për Këshillin Evropian që të çelen negociatat tani dhe pa kushtëzime apo pa kushte. Vendi ka bërë ecuri domethënëse dhe ne besojmë se në këtë raport njihen e vlerësohen të gjitha këto arritje. Reforma në drejtësi dhe rezultatet e saj janë arsyeja kryesore e rekomandimit pozitiv dhe pa kushte për Shqipërinë”,- u shpreh ambasadori Soreca.

Ndërsa, Kryetari i Kuvendit, z. Gramoz Ruçi, duke marrë në dorëzim raportin e progresit, falënderoi ambasadorin Soreca që erdhi në Kuvendin e Shqipërisë me këtë lajm të gëzuar për të gjithë shqiptarët dhe nënvizoi se: “Rekomandimi që bën Komisioni Evropian është i mirëpritur nga të gjithë shqiptarët, pavarësisht nga bindjet politike që ata kanë, pasi është një gjë shumë pozitive që në Shqipëri nuk ka euro-skeptikë. Në këtë rast, sigurisht që ky raport vjen menjëherë pasi kanë përfunduar zgjedhjet në Parlamentin Evropian, rezultati i të cilit është shumë i mirëpritur nga ne, pasi fituan forcat progresiste pro-evropiane. Urojmë dhe shpresojmë shumë që kësaj radhe Këshilli Evropian të marr një vendimmarrje. ashtu siç e ka rekomanduar Komisioni Evropian”.

Kryetari i Kuvendit Ruçi nënvizoi se reformat integruese janë ndërmarrë nga Kuvendi dhe qeveria e Shqipërisë, jo thjesht se janë rekomanduar nga Komisioni e Këshilli Evropian, por sepse u shërbejnë qytetarëve. Reforma në sistemin e drejtësisë është kryereforma jonë. Ai u shpreh se paketa ligjore e reformës ka përfunduar, se ngritja dhe plotësimi i organeve të reja të qeverisjes së sistemit është drejt përfundimit dhe pritet te realizohet brenda këtij sesioni parlamentar. Z. Ruçi u shpreh se ky proces është i pakthyeshëm dhe nuk mund të pengohet nga asnjë forcë apo rrethanë.

“Vetingu vazhdon normalisht dhe Kuvendi e Qeveria kanë krijuar të gjitha kushtet që ky proces të jetë i painfluencueshëm nga asnjë faktor politik. Lufta kundër Korrupsionit është një prioritet i Parlamentit dhe Qeverisë. Beteja kundër krimit të organizuar dhe trafiqeve vazhdon. Kuvendi dhe Qeveria po përpiqen të kompensojnë kohën e humbur për realizimin e reformës zgjedhore”,- u shpreh në takim z. Ruçi.

“Kuvendi ka përmirësuar dukshëm funksionimin e strukturave për procesin e integrimit evropian siç janë: Komisioni i Integrimit Evropian, Këshilli Kombëtar i Integrimit Evropian dhe Komiteti Parlamentar i Stabilizim-Asociimit, të cilët dëshiroj t’i falënderoj për përpjekjet e mëdha që kanë bërë dhe të cilat u vlerësuan edhe nga Komisioni Evropian”,- vijoi Kryetari i Kuvendit.

“Roli legjislativ i Kuvendit dhe sigurimi i përputhshmërisë së ligjeve me standardet e BE-së janë forcuar dukshëm, duke garantuar një përafrim më efektiv dhe cilësi më të mirë të legjislacionit të përafruar”,- shtoi Kryetari Ruçi, duke vijuar: “Edhe roli kontrollues i Kuvendit në çështjet e integrimit evropian është forcuar më tej. Komisioni për Integrimin Evropian dhe Këshilli Kombëtar i Integrimit Evropian kanë luajtur një rol kyç për monitorimin e reformave të kërkuara dhe plotësimin e rekomandimeve në kuadër të procesit të integrimit evropian”,- u shpreh z. Ruçi, njofton Zyra për Informim e Kuvendit.