Veseli: Me Planin Kundërkorrupsion, do t’i zhbllokojmë miliarda euro

Kryetari i Partisë Demokratike të Kosovës, njëherësh kandidat për kryeministër, Kadri Veseli ka thënë se me planin kundër korrupsion do të zhbllokojnë miliarda euro dhe do t’i hapin dhjetëra mijëra vende pune, raporton EkonomiaOnline.

Veseli këto komente i ka bërë gjatë një vizite në Kolegjin UBT , ku së bashku me profesorë të arkitekturës dhe studentë diskutuan për ndërtimet paleje dhe trajtimin e tyre.

Ky është postimi i Veselit në Facebook:

Me Planin Kundër Korrupsionit, ku planifikojmë legalizimin e ndërtimeve pa leje me vetëm 1 euro kosto për metër katror, ne do t’i zhbllokojmë miliarda euro dhe do t’i hapim dhjetëra mijëra vende pune, duke i dhënë kështu hov të madh zhvillimor ekonomisë sonë.

Sot diskutova me profesorët e arkitekturës dhe studentët e UBT-së sesi Kosova ka mbi 350 mijë ndërtime pa leje, pronarët e të cilave kërcënohen çdo ditë me shkatërrimin e atyre pronave, pasi që zyrtarisht ende nuk i kanë në posedim.

Si ekspertë të planifikimit urban dhe ndërtimit, ata e dinë mirë se duke mos i legalizuar po e mbajmë të varrosur një kapital prej 8-9 miliardë euro. Ato prona nuk janë likuide dhe nuk mund të blihen, shiten apo të përdoren si hipotekë për investime të reja.

Ne, brenda dy vjetësh, do t’i çlirojmë qytetarët nga ky ankth me legalizim të përshpejtuar të ndërtimeve që nuk cenojnë pronën apo interesin publik.